ماتدمعيش ..
أول ما كتبه القلم من فيض من المشاهد التى عاصرتها فى غزة ......
وفى الذكرى الاولى للعدوان على غزة وانتصارها .. أكتب ... ما تدمعيش
******
رغم البراكين اللى بتفجر
جبال الذكريات
وابقى انتى أقوى
من رصاص الغدر
واتحدى السكات
راسك شايفها .. فوق هناك
بين السحاب
خليكى فوق
وسيبينا وسط الطين
بنشرب بالخنوع
كاس من تراب
****
يا ألف نجمة فى السما
بتنور الليل اللى عاشنا
فــ موتنا بيه
زعلانة ليه ؟!
لما انتى تبكى .. وانتى صوتك
أقوى من صوت البارود
يبقى احنا نعمل بس إيه ؟!
*****
انتى اللى ربيتى الاسود
بعد اما ساد فى الدنيا
جيش ملعون
جنوده من كلاب
انتى ينابيع الكرامة
اللى بتسقى فى الميدان
أجدع شباب
****
ماتدمعيش ..
ولا أقولك .. دمعى
دمعك طهارة لرجس
عشش
جوة أنفسنا الجبانة
دمعك هيغسل عننا عار الخيانة
دمعى وغرقى بالدمع طيارة الأباتشى
واعدلى كفوف الميزانة
دمعى .. دمعك ده غسل من الجنان
****
دمعى من غير بكا
وافرحى ملو الزمان
والله ابنك حى عمره فــ يوم
ما مات .. ابنك شهيد
على زغاريدك وقولى للجميع ..
" الليلة عيد ..
وكل ليلة وابنى فى الجنة
هاعيشها بألف عيد " ..
مبروك عليكى يا أمنا
يا أم الشهيد .
****
بقلم أحمد دومة
سجن دمنهور العمومى
ليست هناك تعليقات:
إرسال تعليق